KOERKYSE

Dis snaaks maar nie ek of Jessica het aan die begin belang gestel in “dating apps” nie. Jessica se kollega het haar aangemoedig om KOER te probeer en my sussie het vir my van KOER vertel en gesê “probeer tog”. So, aan die begin het ek met twee of drie meisies gesels maar dit het vinnige doodgeloop.  Toe dag ek: “nee wag, ek gaan KOER eers bietjie los”. ‘n Week of wat later, terwyl ek druk besig is met my ma se verjaarsdagreëlings kom daar ‘n KOER-briefie deur.  Dit was Jessica. Ons het begin gesels maar ek was sku en wou nie regtig klets nie. Jessica het nie opgegee nie. Ons het so lekker gekliek dat ons later tot diep in die oggendure in gesels het. Ek het begin planne beraam om haar te ontmoet, natuurlik was beide van ons onseker, dis sekerlik normaal. Twee weke later het sy “ja” gesê vir die ontmoeting en ek ry toe die 134 kilometer langpad af om die meisie te gaan sien. Bygesê ek het dit nog nooit vir enige iemand anders gedoen nie! Ek het die hele naweek daar gekuier. Alles het net in plek geval. Die liefde het net natuurlik begin blom en alles het net die regte weg gegaan. Dis asof ons in mekaar iets wakker gemaak het wat ons gedag het ons jare terug al verloor het. Hier staan ons vandag, saam en verlief en gelukkig getroud!

Met die eerste oopmaak van die app het sy profiel my oog gevang. Sy bio het my hartsnare geroer. Ons het vir twee weke op KOER gesels voor ons eerste afspraak. Min het ek geweet dat dit begin van my liefdesprokie sou wees. Ek en Armand pas soos ‘n legkaart in alle opsigte van ons verhouding. Ons kom lekker met mekaar se families oor die weg en selfs my hondekinders is mal oor Armand – en hy oor hulle! Ons eerste vakansie saam is pas agter die rug waarin elke dag ‘n avontuur was. Dis asof ek my beste vriend se hand kan vashou vir die res van ons lewens saam. Ons is nou ses maande bymekaar en sien uit na die volgende sestig jaar. Ons sal KOER ewig dankbaar wees vir die kans op ware liefde. 

Na ons mekaar geKOER het, het ons eerste afspraak soos ‘n droom afgeloop. Dit was “love at first sight”. Ek is uiteindelik my pasmaat gevind. Magdel se sagte hart, pragtige persoonlikheid en potblou oë het my voete onder my uitgeslaan. Sy is my prinses, my alles! Dankie KOER, julle het regtig ‘n platform geskep waarop ek die liefde van my lewe ontmoet het.

Ek en Charles het mekaar op KOER ontmoet op 5 Desember 2022. Ons het land en sand gesels en die vlinders het in my maag begin draai. Ons woon 60 kilometer van mekaar af, en daar besluit ons toe om die pad aan te druf en mekaar te ontmoet. Met die eerste oogopslag het beide van ons besef dat ons lewens onherroeplik verander is. Ons was gaande oor mekaar! Liefde met die eerste oogopslag soos hulle sê. Ons het oor-en-weer begin kuier. Charles en ek het beide kinders uit vorige verhoudings en dié kom almal te lekker oor die weg. What a blessing! ‘n Paar maande later het Charles my gevra om sy vrou te wees en ek het onmiddelik “ja” gesê.  Ons is op 30 November 2024 getroud. Ons is so gelukkig en smoorverlief. Baie dankie KOER, julle het ‘n wonderlike dating app!

Ons verhaal begin met Simson wie lewenslank op soek was na sy droomvrou en vir ‘n hele ruk op KOER gesoek het maar gevoel het dat liefde vir die voëls was. 

Ek het ‘n rukkie geKOER maar toe besluit “a-nee-a”, dis net weirdo’s wat hier rondhang. Nuuskierigheid het my wel weer laat loer en daar sien ek toe ‘n man met ‘n visstok oor sy skouer. “Tipe van Old-School” sê die profiel. Die begin van ‘n gesprek sonder einde… 

Weke later het Simson vir die eerste keer besluit om die 800km pad platteland toe te ry om die nooi se hart te wen. Een jaar, drie maande en duisende kilometers later is ons getroud! Ek het nooit gedroom dat ‘n aanlyn geselsie my ridder na my toe sou bring nie. My tweede kans op ware liefde. Ons weet dat die Here deel van die storie is en dat Hy vir ons die regte plek en regte tyd gegee het om mekaar te vind. Ons is ‘n trotse Koer-tot-Kansel paartjie en is so dankbaar daarvoor. Hoe bly is ons dat ons toe maar ons aanlyne in die water gegooi het!

Na lang draaie op die pad na liefde het ek op sosiale media die KOER-app raakgesien. Ek is ‘n uitgesproke stadsmeisie wat na alles haas. Daar KOER ek ‘n skaam plaasjaap met die mooiste blou oë raak. Jaco is saggeaard en nederig en kry sy krag van bo. Ons kon vir ure gesels, en elke dag het die geselskap net lekkerder en interessanter geraak.  Weke later besluit ons om te ontmoet. Beide van ons was senuweeagtig maar die oomblik toe ek vir Jaco sien het die angs weggesmelt. Voor hy nog ‘n woord kon uiter het my hart vir my gesê “hierdie is my man”. Vrydae het ek die 165km na Jaco toe aangevat en Sondae na ete weer terug gery. Drie maande later het hy my gevra om te kys. Ons liefde het so geblom dat ons later saam ingetrek het op sy tuisdorp in die Noord-Kaap. Daardie Desember het ons ouers mekaar ontmoet… Jaco se planne was agtermekaar. Jaco sê dat hy gou by een van hul spilpunte wil omgaan en ons stop toe in ‘n pekanneut boord. Ver af in die boord sien ek liggies wat letters vorm. “Wat is dit?” vra ek verbaas en toe ek my weer kry staan die man langs helder verligte woorde “MARRY ME” en sak op sy knie. 

Ek was vir twee jaar op KOER en het ’n paar mense ontmoet, maar nooit in my hart gevoel dat dit die regte een is nie. Ek het altyd vir die Here gevra om my te bewaar, en dat Hy die gesprekke sou laat doodloop as dit nie Sy wil was nie.

Na baie probeerslae het ek moedeloos geraak en die app afgevee – net om dit weer af te laai en weer uit te vee. Uiteindelik het ek besluit ek is klaar. My pa het egter altyd gesê ek moet weer probeer, weer KOER, weer my hart waag. In Maart 2025 het ons langs die dam gesit toe hy sê: “Vat nog een kans.” Net daar het ek gebid en vir die Here gesê ek probeer nog een keer, en Hy moet my lei.

’n Paar weke later, op ’n mooi dag in April, kry ek ’n KOER van André. Sommer met die eerste gesprek het ek geweet hier’s iets besonders. Ons was gou smoorverlief, en Jesus was van die begin af deel van ons storie. Al die bevestigings waarvoor ons gebid het, is vir ons gewys.

André het my op my verjaarsdag uitgevra, en in September het hy my gevra om te trou. Hy maak my gelukkig, beteken alles vir my, en ek kan my lewe nie sonder hom indink nie. Ek is só dankbaar dat Jesus julle app gebruik het om ons bymekaar te bring. Wat ’n voorreg!

Ons #koerkys-verhaal begin al in Februarie 2023. Ek het vir Sascha op KOER gesien en gedink dat dit super koel is dat my noemnaam (Sasha) en sy naam Sascha ooreenstem. Aan die begin het ons nie elke dag gesels nie maar mettertyd het die liefde begin blom. Ons het heerlik geklets en hy het sommer vroeg al gesê dat hy met my gaan trou. Ek het gelag en gedink “ag, hulle almal sê dit”. Ons eerste dag saam was die 28ste Julie. Tot vandag sê ons vir mekaar: “Ek het jou lief tot vir altyd en 28 dae” wat verwys na daardie eerste date. Wat ek goed onthou van die eerste oogopslag was dat ek so bly was dat hy langer is as ek! Hoe kon ons daardie dag weet dat ons vir altyd bymekaar sou wou wees. Ons het dae en weke en maande om gelag, gesels en ons harte gedeel. Soms sommer die hele dag lank van sonsopkoms tot ons gaan slaap. Op 30 September 2023 het ons verloof geraak. Dit was gou maar ons het beide net geweet dat dit die regte ding is. In die warboel van wondelike verlief wees, die spanning van beplanning en vlinders op die dag was ons troudag ‘n sprokie! Ons wittebrood was lieflik en ons is so dankbaar vir KOER want nou vier twee siele – wie eens alleen was – jaarliks ‘n huweliksherdenking!

As twee harte wat vir ’n oomblik heeltemal opgegee het op die liefde, sal ek en Christiaan vir ewig dankbaar wees vir KOER. Voor ons ontmoeting het ons albei besluit om eerder huiskatte te wees en na ons ouers om te sien. En toe verskyn daardie KOER-advertensie op Facebook…

Ek het op ’n Sondag ná die kerkdiens in die parkeerarea gesit en vir die Here gevra vir my deel in die lewe. Soos almal weet, die Here help diegene wat hulself help. Ek sien toe daardie KOER-advertensie en laai die app af.

Intussen was Christiaan al op KOER maar kon net nie sy deksel vind nie. Ek was eers huiwerig toe ek mans op die app sien wat vir my die maan en sterre belowe. My hart het gehunker na iets eg ,’n beste vriend, ’n sielsgenoot.

En daar land Christiaan se koevertjie in my posbus: “Haai mooiste.” Ek moet erken, ek het gesmelt! Daar in die kerk se parkeerarea begin ek met hom gesels. Ek het dadelik sy sagte, opregte gees raakgesien. ’n Paar weke later het ons ontmoet. Al die pad uit die Noord-Kaap het dié man Weskus toe gery. Wat ’n beautiful naweek saam met sy “mooi-mooi” nooi!

Ons het besef dat ons vir mekaar moes wag in die lewe. Ons ouers het ons verhouding geseën en ondersteun, en vandag is ons verloof! Ons is besig om ’n nessie te skrop en droom daarvan om ’n gesin te begin. Dinge gaan goed, ons harte brand warm en ons het selfs ’n besigheid begin met die naam Mooi-mooi.

Alles te danke aan KOER!

Ek het langs my beste pel op ‘n bank gesit to ek KOER die eerste keer probeer. Ons het gelag en ge-kyk-hier en soveel pret gehad en op dag vier sien ek vir Nico raak. Ek moes ‘n kans vat! Mens dink mos altyd iemand is uit jou “league” uit, maar ‘n paar minute later “koer” hy terug. Wat ek nie geweet het nie was dat hy op pad was om KOER uit te wis toe hy my boodskap sien. Nico is maar stil en ek glo dis genade van bo dat hy na sy ouma geluister het en wel ‘n KOER profiel oopgemaak het. Sy profiel het gelees: “Naweke is vir braai, familie en F1”. Ek begin toe maar die gesprek met “Verstappen of Perez?” en daar trek ons liefdesreis weg. Dit was Junie 2022 en ons eerste date was ‘n maand later. Ek het vir Nico deur my voorruit sien aankom en so gebewe oor die lang, gespierde ou. Waarskynlik die mooiste man wat ek al ooit gesien het. Daardie aand het ons albei geweet dat ons vir mekaar bedoel is. In Oktober 2022, tydens ‘n naweek-troue in die Vrystaat het hy stilletjies ‘n klein hout hartjie in my handsak gedruk waarop hy geskryf het “Sal jy my meisie wees?” Ek het eers die Maandag daarna op die hartjie afgekom maar my antwoord was JA! Onder ‘n ou akkerboom op ons familieplaas in Dullstroom het Nico my op 23 Desember 2024 gevra om te trou. Dis so wonderlik om te dink ons was twee uiteenlopende persoonlikhede wie mekaar op ‘n app gevind het en nou is ons so ongelooflik gelukkig saam. Dankie aan Koer, dit was 100% die moeite werd. Elke pot het waarlik sy deksel. 

Hierdie is ‘n romanse wat ontvou oor 275km, 33 vereistes op my liefdeslysie, twee provinsies, twee harte oorwonne en een wonderlike verhouding. My niggie was pas geskei en ek wou haar opbeur deur saam met haar by KOER aan te sluit. Uit die honderde profiele het Berno se foto dadelik my oog gevang. Dis iets besonders in sy kyk en glimlag wat my hart steeds bollemakiesie laat slaan. Ons het mekaar gekoer en ek het gewag dat hy die gesprek inisieer. Sy gebruik van die bekende lyn uit Friends: “Hey, how you doin’?” het my laat lag. Ons het nagte om gesels om mekaar beter te leer ken. Op ‘n dag het Berno kom kuier. Hy het so vinnig Boksburg toe gery dat ek nog in my pajamas was to hy klop. Dit was die begin van verlief raak, ek was so oorweldig dat ek vier keer dieselfde vraag gevra het.  Koffie-dates het piekniek dates onder wilgerbome geword waar hy my onderlangs met takkies sou gooi. Ek het ook by hom in Bethlehem gaan kuier. Een aand onder ‘n verskietende ster wens ek dat hy so oud soos die berge sal word. Die volgende dag vra hy my toe om te kys en ek sê ja!  Ons is dolgelukkig. Ons hemelse Vader het my voorgetrek deur Berno oor my pad te stuur. Ek het ‘n statistiek gelees wat sê dat 60% van verliefdes mekaar aanlyn vind. Sonder KOER sou ek vir seker nie vir Berno gevind het nie. Dankie KOER!

Ek wil graag ’n oomblik neem om vir julle dankie te sê vir hierdie wonderlike platform. Sonder julle sou ek vandag nie die gelukkigste vrou met die beste man gewees het nie. Dit was regtig ware liefde met die eerste KOER!

Van ons heel eerste afspraak af het ek in my hart en siel geweet dat ek vir altyd saam met JP gaan wees. Vyf maande later het ons verloof geraak en ’n jaar daarna is ons getroud. Nou, vier pragtige maande ná daardie sprokiesdag, kan ek eerlik sê dat hierdie getroude hoofstuk die mooiste deel van my en JP se lewesverhale is.

Alhoewel ons nie baie KOER-afsprake gehad het nie – seker maar ons geluk dat die app ons so vinnig en perfek aan mekaar voorgestel het – is ons ongelooflik dankbaar. Ons is bly dat ons KOER ontdek en afgelaai het maar nóg meer verheug dat ons dit weer kon uitvee.

Deur KOER het ek nie net my lewensmaat ontmoet nie, maar ook my beste vriend, my anker en my broer in God. Hiervoor kan ons nie genoeg dankie sê nie.

Ek wil graag my en Hanru se storie met julle deel. Ek hoop mense kan dit lees en weer nuwe hoop vind, want na ons ervaring is ons waarlik oortuig dat daar liefde vir almal is – en dat liefde wen!

Ek en Hanru het mekaar in Februarie 2024 raakgeKOER. Ons het vreeslik lekker geklets op die app en drie weke later het hy my gevra of ons nie maar kan ontmoet nie. Hy het al die pad gery na my toe. Daar het die vlam van liefde begin vonk.

Ek het later op sy wildsplaas in Limpopo gaan kuier – die jintelman het my ewe kom haal – en dit was ’n wonderlike naweek. Om ’n lang storie kort te maak: sewe maande later was ons verloof en op 6 September 2025 is ons getroud. Dit was ’n romantiese warrelwind en absoluut die moeite werd!

’n Mens voel soms of jy op moedverlore vlakte sit, maar liefde kom wanneer jy dit die minste verwag. Al was jou hart soveel keer teleurgestel, daar ís hoop – en ons liefde bewys dat wanneer daai regte mens kom, liefde vér wen!

Baie dankie, KOER. As dit nie vir julle was nie, sou ek nooit my trouman ontmoet het nie.

Ons hele storie het op KOER begin en ek wil dit deel. Van band tot belofte. Dit het alles met ‘n eenvoudige boodskap begin. Op ‘n maatsoek-app van alle plekke! Die eerste oproep was eintlik wat dinge in my hart maak draai het. Daar was onmiddelik ‘n onsigbare band – wat met elke gesprek net dieper geraak het. Ons kon vir ure gesels oor God, die lewe en die waardes wat albei van ons koester. Ons harte het net perfek ooreengestem. Ons het baie gelag en beide van ons was lief vir speletjies en raaisels. Ons het ver uit mekaar uit gewoon, Alisha was in Pretoria en ek in Phalaborwa, so die verlange was groot en die kilometers baie. Die dag toe ek die eerste keer na haar toe ry vir ‘n kuier was my opwinding en senuwees ewe hoog. Sy was alles waaroor ek kon droom, en meer. Die naweek was wonderlik. Ons het hand-aan-hand gestap (met haar hond Ozzy aan ons sy), diep gesels, drome gedeel en besluit oor die liefdesverhouding wat ons wou bou. Na daardie naweek was een ding seker, ons was mal verlief! ‘n Paar weke later beraam ek toe ‘n spesiale plan en stel vyf raaisels op – elkeen met ‘n leidraad – ‘n liefdes-skattejag. Dis hoe ek vir Alisha gevra het om myne te wees. Die koeël was deur die kerk. Dis nou al weer ‘n tydjie later en ek kan vandag vir Alisha my verloofde noem! Dankie KOER, ons harte is vol!

Ek het vir Marinique op KOER ontmoet in 2023. Ek was in Amerika en alleen en het huis toe verlang. Ek was op soek na ware liefde in Afrikaans toe ek haar op die app ontmoet. As julle net kan weet hoeveel blomme ek deur Netflorst in SA laat aflaai het… lekker verlief op die KOER-kys! My hart was gewen. Ek het einde 2024 teruggevlieg Suid-Afrika toe en vir Marinique gevra om te trou. Ek was super opgewonde oor dié “ja-woord” wat ek gekry het toe ek weer weg is Amerika toe vir nog ‘n seisoen. Nou is ek terug en ons is baie gelukkig en getroud hier in Suid-Afrika! Dankie KOER.

Ek en Shaun het in 2022 op KOER begin gesels. Beide van ons het in daardie tyd gedink dat ons eintlik al handoek ingegooi wanneer dit by die liefde kom. Maar wonder bo wonder het ons albei tog die Afrikaanse maatsoek-app probeer. Shaun het die app al afgeskryf toe hy ‘n kennisgewing kry om te sê daar is iemand op KOER wie in hom belangstel. Hy het toe maar weer die app oopgemaak met die doel om die hele ding net te “delete” maar nuuskierigheid het die oorhand gekry. Toe Shaun gaan loer wie die “pasmaat” is wat in sy posbus lê was dit ek! Ons het so lekker gesels en vinnig besef dat hier iets spesiaals besig is om te blom. Fast forward (soos die Engelsman sê) ‘n paar jaar later en op 22 Februarie 2025 is ons getroud. Liefde het wragtig gewen. Dankie KOER!

Ek en Hewalt het beide aan die einde van 2023 die KOER-app begin gebruik. Ek kan nou nog sy profiel voor my sien – asof dit gister was. Daar was net een foto van hom waar hy agter sy dromstel sit. Sy gesig was skaars te siene. Ek het besluit om eenvoudig ‘n kans te vat en druk toe Koer. Ons het lekker gesels en ‘n ontmoeting gereël. Sy goeie maniere en ordentlikheid was wonderlik om te sien. Hy het my kom haal en uitgeneem vir ete. Hy het ook vir my ‘n blommetjie gegee wat hy langs die pad gepluk het. Ons het in die kar al flippen lekker gesels en soveel in gemeen gehad. Daardie dag het ek my toekomsige man ontmoet, maar hoe sou ons dit toe kon raai? Daardie eerste afspraak was die begin van ons verhouding en kort daarna het hy my gevra om sy meisie te wees. Maande en honderde gelukkige dae later het hy in Mosselbaai tussen die Olifante op sy knie gesak. Dit was absoluut amazing! Die mooiste ervaring wat ek ooit sal beleef. Ek kon nie vir ‘n beter verloofde vra nie. Ons trou volgende September.